Bost urte pasa dira dagoeneko balea azkenengoz arrantzatu zenetik, eta gertu da berriz barraren aurrera agertuko den eguna. 2016ko maiatzaren 14an laugarren aldiz ospatuko da Orion Balearen eguna, eta Udalak hainbat ekitaldi antolatuko ditu. Horien artean herri antzerkia egongo da eta, ohi bezala, Iñake Irastorzak zuzenduko du.
Herri antzerkirako herritarren parte-hartzea ezinbestekoa da eta, horregatik, Udalak deialdia ireki du eta balearena guztien artean antolatutako festa izan dadin. Beraz, herri antzerkian parte hartu nahi duenak otsailaren 29ra arte izango du izena emateko aukera. Bi modutara egin daiteke, Kultur Etxera joz 9:00etatik 13:00etara eta 16:00etatik 20:00etara edo kultura@orio.eus helbidera idatziz.