Santiagotarrak, 50 urte Bidasoan horixe da liburuaren izenburua. Santiagotarrak Irungo kirol elkartea da, orain dela 51 urte sortua, 1966an. Iaz, urteurrenaren ospakizunen barruan, plazaratu nahi zuten liburua; baina atzerapen txiki bat tarteko, orain eman dute argitara. Santiagotarrak klubak ur kirolak landu ditu sortu zenetik: piragua, kanoa, eta arraunean: olinpikoa eta tostakoa.
Klubak kirol horietan denetan 50 urteotan egindako ibilbidea erakutsi nahi izan du Manu Etxeberriak hiru hizkuntzatan plazaratutako liburuan. Euskaraz eta gaztelaniaz idatzita dago, baina testuaren frantsesezko laburpena ere badu; eta argazki eder askorekin hornituta dator.
Manuk lehendik ere lau liburu ditu idatziak arraunaren gainean. Orioko arraunaren ibilbidea landu zuen lehenengo; ondoren, Zarauzkoa ere aztertu zuen, han bertan bizi zen garaian. Orain, Hendaian bizi baita, Bidasoaren ertzean, Irungo ur kirolen klubaren jarduna erakustea egokitu zaio. Eta emaitza liburu mardul eta dotorea izan da.