Apirilaren 28rako eta 29rako Rocio Jaialdia antolatu du Orion Arkupe Merkari eta Ostalarien elkarteak, Orioko Udalaren laguntzarekin. Bi egunez Andaluziako Rocio herrixkako erromeria giroan murgilduko da herria, eta oriotarrak eta bisitariak jaian parte hartzera gonbidatu dituzte elkartetik.
Hileko azken asteburuan, Rocio herriko jaialdian ohikoak diren bi etxetxo jarriko dituzte Orion; bata Kutixi kafetegiaren aurrean, eta bestea Antilla tabernaren aurrean. Gainera, Semblante Rociero taldeak girotuko du herria ostiral eta larunbat iluntzean.
Oriotarrak flamenkoz jantzita kalera
Ostiralerako giro andaluziarra izango duen pintxo potea antolatu dute, eta Semblante Rociero taldeak kalejira egingo du herrian zehar. Larunbatean berriz, oriotarrak jantzi flamenkoak jantzita kalera ateratzera animatu dituzte Arkupe elkartetik. Etxetxoetan Photocall-ak jarriko dituzte, eta horietan ateratako argazkiak Arkupe elkartearen Facebook orrian partekatzea nahi dute antolatzaileek. Argazki onenak 200 euroko saria irabaziko du.