RUBEN IGLESIAS - Orioko herri galdeketako kontrol batzordeko kidea
Kontrol batzordeak galdeketan zehar gardentasuna eta neutraltasuna zaintzea du helburu, eta horretan aritu zen atzo Ruben Iglesias oriotarra.
Zer moduz joan zen atzoko eguna?
Ez zen arazo berezirik izan herri galdeketan zehar. Oriotarrek boza emateko gogo eta ilusio handia erakutsi zuten, eta etxetik atera ezin zuen oriotar batek botoa eman zezan, haren etxeren bertaratu genuen hautetsontzia. Oro har, jendea oso gustura ibili da.
Atzo Orion egin zena urrats garrantzitsua izan al da?
Bai. Uste dut pausu garrantzitsua dela herritarrei erabakitzeko eskubidea eta beren iritzia emateko aukera eman diegulako. Galdeketa oraindik ezin izan dugu modu legalean egin, baina espero dugu datorren galdeketa legezkoa izatea eta errealitatea aldatzeko balio izatea.
Bide berri bat hasi al da?
Iruditzen zaigu sentsibilitate desberdinak gerturatu eta elkartu dituela herri galdeketa. Orain arte nahiko banatua egon da euskal gizartea, herritarrak beren alderdi politikoaren itzalpean egon dira. Hala ere, ekimen honek erakutsi digu euskaldunok bat gatozela hainbat ideietan, erabakitzeko nahian esaterako.