Gipuzkoarrak eguzkia hartzeko ohituren inguruan ohartarazi nahi ditu Minbiziaren Aurkako Elkarteak, eta aurten haur eta gaztetxoen artean prebentzioa lantzeko ahalegin berezia egingo du. Horretarako, Eguzkiak aztarna ahaztezinak utz ditzake zure larruazalean lelopean kanpaina martxan jarriko du elkarteak hilaren 4tik 21era. Gipuzkoako hainbat herritan eta hiritan izango dira, tartean Aian.
Uztailaren 14an, 10:00etatik 13:00etara, Aian jarriko dute postua Minbiziaren Aurkako Elkarteko profesionalek eta boluntarioek. Bertan, herritarren azaleko melanina neurtuko dute, eta horren arabera eguzkitan zenbat denbora egon daitezkeen azalduko diete, bakoitzaren ezaugarriak kontutan hartuta. Horrez gain, eguzkia hartzeko eta azaleko azterketa egiteko gomendioak jasotzen dituen liburuxkak ere banatuko dituzte aiarren artean.