LIBE ESNAL- Aiako igerilekuetako soroslea
Nola doa aurtengo denboraldia?
Nahiko ondo doa. Hasiera batean eguraldia ez zen oso ondo portatu. Uztailean, ordea, giro paregabea izan dugu eta horrek jendea erakarri du.
Herrikoez gain, kanpoko jendea ere etortzen da?
Uda honetan kanpoko jende asko ari da etortzen herritarrez gain. Udalekuetatik, adibidez, urtero hurbiltzen dira tolosarrak, zarauztarrak e.a. Halaber, Zarauzko eta inguruko herrietan ostatu hartzen duen jendea ere gerturatzen da.
Noiz arte izango dira igerilekuak zabalik? Eta zein ordutegitan?
Ekainaren 2tik irailaren 2ra arte egongo dira irekita eta ordutegia goizeko 11:00etatik arratsaldeko 20:00etara izango da. Hori, igerilekuei dagokienez; tabernaren kasuan, gauean ere zabalik egoten da, afariak ematen dira eta.
Zerk erakartzen du jendea Aiako igerilekuetara?
Igerilekuek ematen duten askatasunak erakartzen ditu bisitariak. Ez da berdina gurasoentzat beraien haurrak hondartzatik aske uztea... igerileku batek segurtasun handiagoa ematen du. Gainera, plan ezberdin bat izan daiteke. Aia herri polita da eta jendeak egun pasa egiteko aprobetxatzen du: goizean etorri, igerilekuko tabernan bazkaldu eta, arratsaldean, berriro, bainua hartzera.