Afizioa txikitatik ez datorkion arren, hiru urte daramatza Joseba Pagadizabalek (2000, Aia) ohitura zaharrei eutsiz, iraileko igandeetan Ernio mendira igotzen. Horrez gain, abuztuaren 29an ospatzen den San Juan Txiki egunean ere joaten da bertara. Tradizio berezi hau nondik datorren oso ziur ez dakien arren, artzantzatik datorren ohitura izango denaren ustea dauka aiarrak.
Mendiko txangoaz gain, Zelatungo erromeriak ere entzutetsuak dira, eta hain zuzen ere, Pagadizabal han hasi zen lehen aldiz trikitixa doinuak dantzatzen ikasten. "Neska ere han ezagutu nuen, eta harrezkero igandero ibiltzen naiz dantzan".
Lehengo belaunaldiek ohiturari eutsi bazieten ere, gaur egun gazte gutxi ikusi ohi dituela azaldu du aiarrak. "Orain tradizioari jarraitzeko ohitura handirik ez dago, baina azkenean jende asko elkartzen gara. Zaharrak, gazteak, denetik apur bat. Gazteok asko ez izan arren, gutxi batzuk eusten diogu erromerian dantzatzearen ohiturari".