Talaimendiko etxeko ikerketa behin-behinean artxibatu du epaitegiak

(Alberto Uriona)

Gipuzkoako Aire Kiroletako Federazioaren abokatuak "ontzat" jo du erabakia. Haren ustez, beste edozein erabakik "babes gabe" utziko zukeen jendea. Aurreko epailea jo du horren erantzuletzat.

Azpeitiko epaitegiak behin-behinean artxibatu du lurzoru legea urratzea egozten dioten Talaimendiko etxearen harira auzipetuta zeuden bost lagunen inguruko ikerketa. Azaroaren 18ko erabakiak nabarmen adierazten du ezin dela epaiketarekin aurrera jarraitu prozesu honetan ez delako inolako frogarik aurkitu. “Hautuak esaten ez duena da nor den honen guztiaren erruduna. Jakina, erantzulea epailea (Maria de Blas) eta Azpeitiko instrukzioko 2. epaitegiko kide guztiak dira”, aditzera eman du Gipuzkoako Aire Kiroletako Federazioaren abokatu Asier Garatek. 

Duela urtebete Azpeitiko instrukzioko 2. epaitegiak hartutako erabakiz, “ondarearen eta gizarte eta ekonomia ordenaren aurkako delituengatik” deklaratzera deitu zituen Aiako alkate ohi Igor Iturain, Maria Garrastazu, Elisabeth Garrastazu eta Aiako Udaleko bi teknikari: Gaizka Perosterena arkitektua eta Mikel Iradi aparejadorea. Deklarazioa hartzea martxoaren 11n zehaztu bazen ere, kaltetuek errekurritu egin zuten, esanez instrukzio epea 2018ko irailean bukatu zela. Maria de Blas epaileak epea luzatu bazuen ere, ez zuen martxora arte egin eta epe legala gaindituta zegoenez, ezin izan zuten bost auzipetuen testigantzarik jaso.

“Epaile honek irteerarik gabeko kale batean utzi zuen gaia. Horrez gain, guk ere ez dugu nahi epai batek eragitea norbaiten errugabetasuna. Beraz, argi zegoen epaile horrek hartutako edozein erabakik behin-behinean etorri behar zuela, Gipuzkoako Epaitegian esandakoaren ondoren. Beste edozein erabakik babesgabe utziko zukeen jendea, egoera jasanezin bihurtuz”, dio  Gipuzkoako Aire Kiroletako Federazioaren abokatuak.

Edonola ere, oso argia izan da bere hitzetan: “Guk nahi dugu sententzia kondenatzaile bat egotea, errekurtso legal guztiekin egindakoa eta bi aldeentzako prozesu berarekin, bai akusazioarentzat bai defentsarentzat. Beraz, ontzat jotzen dugu behin-behinean artxibatzeko epaitegiak hartu duen erabakia”. Azken erabakia epaile berri baten eskutik dator orain, Adrian Camararen eskutik.

Atea zabalik

“Epaile berriak zehatz-mehatz dio ezin izan dela jarraitu auziarekin, ezin izan delako justifikatu delitu kausaren konkurrentzia. Baina ez dio zantzurik ez dagoenik. Horregatik, behin betikoz artxibatu beharrean, behin-behinekoz egiten du eta ate bat zabalik uzten du, berreskuratzeko aukerarekin. Hori da egingo duguna”, azaldu Garatek.

Erabakiak hartu dituztela jada  jakitera eman du Gipuzkoako Aire Kiroletako Federazioaren abokatuak, baina oraindik ez dituztela argituko esan du. “Gure bidea da errekurtso penal osoak aztertzea. Beraz, hor gabiltza lanean. Gure idazki baten zirriborroa ia egina dugu lizentzia hauek berriro helarazteko, eta horrekin hainbat gauza ere jakingo dira bere momentuan”.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!