Aian bota du elurra urte berria hastearekin batera

Alerta laranja aurreikusita zegoen atzo gauetik gaur 15:00ak arte, eta elur makina goizean goizetik ibili da Aiatik Iturriotzeko bidegurutzera arteko bidea garbitzen eta gatza botatzen. Pagoetarako bidea hartu du herritar eta mendizale askok.

Alerta laranja aktibatuta dago atzo gauetik, eta goiz osoan zehar mantenduko dute. Izan ere, tenperaturak baxuak dira; Gipuzkoan, 2 eta 5 gradu artean ibiliko dira gaur, eta goizaldean elurra bota du toki askotan. Aian, esaterako. Teilatuak eta errepide bazterrak zuri zeuden goizak aurrera egin ahala ere. Mendizale eta herritar andana abiatu da Pagoeta aldera, bai herritik, bai Iturriotzetik.

Urola Kostari dagokionez, puntu altueneko errepide zati batzuk itxita zeuden goizean: Urraki, esaterako, itxita dago kamioi eta ibilgailu artikulatuentzat, eta autoek kateak behar dituzte zirkulatzeko. 

Beste puntu batzuetan arretaz gidatzea gomendatu dute: Orioko gainean (Zudugarai), Azkoitian Azkaraten, Mandubin.

Bestalde, oraingoz normaltasuna da nagusi Meagan, Elosuan eta Itziarren.

Atzo iluntzean gatza bota zuten errepide askotan, izotzagatik istripuak saihesteko.

Alertak, egun osoan

Elurragatik ezarritako alerta laranja 15:00ak arte egongo da indarrean. Elur -kota 200-400 metro artean egongo da, eta ekaitza eta txingorra bota ditzake. 15:00etatik gauerdira bitartean, berriz, abisu horia egongo da indarrean.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!