6.000 kilo gatzekin Aia eta Iturriotzeko bidegurutze artean

Antxon, gaur goizean Aian (Onintza Lete Arrieta)

Elur makinak dabiltza aurrera eta atzera atzo iluntzetik Euskal Herriko hainbat txokotan. Antxon donostiarra, esaterako, 06:30etik dabil Aian, elurra errepidetik kendu eta gatza botatzen.

Laneguna Aia eta Iturriotzeko bidegurutze artean gora eta behera pasako du gaur Antxon donostiarrak elur makinarekin. 06:30ean hasi da bere txanda, "eta 08:30ak arte gelditu gabe ibili naiz palarekin eta gatza botaz", azaldu du. 11:00etarako lau joan-etorri eginak zituen aipatutako errepide zati horretan. Arazo handirik ez du ikusi errepidean, baina jendea mendira joateko autoa uzten hasi da Iturriotzeko bidegurutze inguruan, eta azken itzulian justu-justu eman du buelta. "Enpresakoei jakinarazi diet, eta momentuz ez naiz haraino joango", kontatu du atseden hartzen ari zen tartean.

14:00etan amaituko da bere txanda, eta ondoren beste lankide bat etorriko da, errepide zati bera garbitzera. Gauez ere ariko da hirugarren bat.

Kamioian 6.000 kilo gatz daramatza, "berez nahikoa da nire txandarako". Gehiago beharko balute, berriz, Andoainen dute materiala hartzeko tokia. "Niri zonalde hau tokatu zait, beste batzuk Artikutzan daude, Aiako Harrietan ere bai...".

ARGAZKI BILDUMA. Elurra Aian 2021 hasiera honetan

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!