Pagoeta natur parkea eta han bizi diren animaliak hobeto ezagutzeko aukera polita izango da igande goizean, Iturraran parketxeak antolatu duen ibilaldi gidatuari esker. Jon Ander Azpiroz aditua gidari hartuta, bi ordu eta erdiz Pagoetako basoetan barrena ibiliko dira txangoan parte hartzen dutenak, mendiko bidexkak, ileak, oinatzak, jandako elikagaien arrastoak eta beste hainbat gauza ikertzen.
10:00etan Artetxotako bidegurutzean jarri dute hitzordua, eta handik hasiko dute ibilaldia. Dena dela, beharrezkoa izango da aurrez izena ematea iturraran@gipuzkoanatura.eus helbidera idatzita edo 943-83 52 89 telefono zenbakira deituta. Jardueran parte hartzeko, bost euro ordaindu beharko dute helduek eta hiru euro umeek.