Larunbat arratsaldean alebin eta infantil mailetako Eskolarteko Pala Txapelketaren finalak jokatu zituzten Aiako pilotalekuan. Alebinen mailakoan, Intza Iturain eta Kimetz Atorrasagasti aiarrek Altzoko pilotariak izan zituzten aurrez aurre, eta etxekoek ez zuten barkatu. Infantilen mailako finala, berriz, Altzoko eta Lizardi-Igeldoko pilotarien artekoa izan zen, eta hori Altzokoentzat izan zen.
Alebinen mailan, hiru partidatara jokatu zuten finala: aurrena, banakako bi partida jokatu zituzten; eta gero, binakakoa. Hirutik bi irabaztea nahikoa zen txapela janzteko, baina aiarrek hirutik hiru irabazi zituzten. Atorrasagastik 10 eta 4 irabazi zuen banakakoa; Iturainek 10 eta 8; eta finala borobiltzeko, 15 eta 8 nagusitu ziren binakakoan.
Infantil mailako finalean, berriz, Altzoko bikoteak lortu zuen garaipena Lizardi-Igeldoren aurka, 25 eta 7ko emaitzarekin.