Gaur izango du azken eguna, eta egun tristea izaten ari dela aitortu du. Kooperatiba eta Mikel Rezabalen harategia dira herriko janari denda bakarrak, baina egoera "eutsiezina" zela aitortu du. "Zaila izan da erabakia hartzea. Faktore asko bat etorri dira: gero eta mugimendu gutxiago nabari da herrian eta hornitzen genituen herriko jatetxe eta tabernak itxi egin dituzte; gainera, aiarrek herritik kanpo erosketak egiteko gero eta ohitura handiagoa dute eta asko jaitsi dira salmentak. Horrez gain, argi-indarraren prezioaren gorakadak ere min handia eman digu, eta Ticket Bai sistema martxan jartzeak inbertsio handia eskatzen zigun. Zaila da egoera horretan aurrera egitea, eta ixtea erabaki dugu". Orain, indartsu aurrera egiteko unea dela uste du Rezabalek. "Ganadua dugu eta baserriko lanetan zentratuko naiz, eta denborak erakutsiko digu zein bide hartu behar dugun".
Rezabal bezalaxe, bezero asko penaturik daude erabakiarekin, eta banan-banan eskerrak emanez agurtu ditu herriko harakinak. Bezeroengandik esker ona jaso du azken egun hauetan, urtetan herrian eman duen zerbitzua eskertu diote.