1
Mediterraneoa
epela da berez,
inoiz oporraldian
eman digu babes,
baina azken aldian
bete da hilotzez.
Zer da mila bizitzak
egitea ihes?
Hoixe, izeberg-aren
punta besterik ez.
2
Latza da izeberg-ak
bistan dakarrena,
baina Europak lehengo
hanketik herrena!
Gerratik ta gosetik
ahal den azkarrena
ihesean Afrika
urpean barrena,
ez dugu ikusi nahi
hori da txarrena.
3
Ustiatzen ditugu
hango itsasoak,
hango ikatza ta bitxi,
ta hango basoak.
Sortzen ditugu hango
gerrak, arazoak...
ta inork emanez gero
honanzko pausoak,
izeberg-etik gertu
daude marrazoak.