Kostako bost udalerrietan 2017ko apirilean %38,26 jaso zen hondakina ongi sailkatuta kaleko edukiontzietan, eta aurten %68,14 izan da sailkatuta jasotakoa; adibidez, 2017ko apirilean 872.890 tona errefusa eta 129.880 tona biohondakin jaso ziren, aurten, berriz, 334.470 tona errefusa eta 266.340 tona biohondakin bildu dira. Alde horretatik, herritarrak zoriondu eta eskertu ditu Iturainek, "igoera honen eragileak izan direlako".
Herritarrena bezala, ostalarien, merkatarien eta enpresen arduradunen "ahalegina" nabarmendu du Iturainek, "pauso hau eman izan ez balute beste datu batzuez hitz egiten arituko ginelako". Merkataritza, ostalaritza eta zerbitzuetako establezimenduen puntuz putuko bilketan %79,66ko sailkatze tasa lortu da aurtengo apirilean, eta industrialdeetako enpresen kasuan, berriz, %71,86koa. Datu "adierazgarriak" direla adierazi du UKUEko lehendakariak, baina zerbitzua hobetzen eta herritarrentzat ahalik eta erosoen izan dadin lanean jarraituko dutela. Lehen hilabete hauetan gorabehera batzuk izan direla gaineratu du: edukiontziontziekin ebakiak edota istriputxoak, zailtasunak edukiontzien tapak irekitzerakoan eta txartelak banatzerakoan, besteak beste. "Baina martxotik hona jaso dugun pertzepzioa da sistema egonkortzen ari dela".
