PAPEREKOA

Elikadura kontzientea etxean hasten da

Hona hemen Miren Albenizek KARKARAren 411. zenbakirako idatzitako artikulua. Osasuna helduleku, elikadura izan du hizpide. "Faktore emozionala eta haurren elikadura elkarri lotuta daude".

Estatu mailan baino egoera hobea dugun arren, Euskal herriko haurren gizentasun tasa geroz eta altuagoa da. Zer egiten dugu gaizki? Presaka bizi gara, eta gurasoon denbora faltak haurren elikaduran eragina du.

Haurrek txikitatik jateko ohiturak har ditzaten, gurasook eredu izan behar dugu, eta denbora pasa behar dugu asteko menuak planifikatzen, janaria erosten, sukaldatzen… Jatorduak aurreikusi egin behar dira, inprobisatu beharrean. Kontzientzia kontua da, azken finean.

Erosketa eredua ere asko aldatu da, eta elikagai prozesatuak egunero kontsumitzen dira etxe askotan. Horiek balio nutritibo gutxi, eta azukre eta gantz asko izaten dute, eta ondorioz, haurrek hartu beharko luketena baino 3-4 aldiz azukre gehiago jan ohi dute. Publizitateak eta marketinak ere zeresana izaten du horretan. Iragarkiek gehienetan produktuen alderdi positiboa azpimarratzen dute, kaltegarriak diren osagaiak ezkutatuz. Hala, haur txikien lehenengo papillak, jogurtak edo gailetak ezinbestekoak eta osasungarriak balira bezala saltzen dizkigute, eta nahi gabe, txikitatik azukre mordoa ematen diegu. Koxkorragoak direnean ere, egunero kontsumitzen dituzte opil industrialak, zuku eta batido komertzialak, gailetak… betiko fruta eta ogitartekoa baztertuz.

Gainera, gaur egun ariketa fisiko gutxi egiten dute haurrek. Erosotasunez josita bizi gara, eta pantailen aurrean ordu asko pasatzen dituzte. Horregatik, oso garrantzitsua da jolas aktiboa bultzatzea umeen artean, eskoletan nahiz etxean. Gurasook ere badugu zer hobetua alderdi horretan, pantaila bat eskaintzea baino osasuntsuagoa baita seme-alabei gure denbora eskaintzea.

Bestalde, aintzakotan hartzen ez badugu ere, faktore emozionala eta haurren elikadura elkarri lotuta daude. Estresa, antsietatea, presioa edo asperraldia kudeatzen ez dakiten haurrek ohitura txarrak hartzeko joera handiagoa izaten dute. Garrantzitsua da helduok haurren bidelagun izatea sentimendu horiek bideratzen erakusteko, eta mahai bueltan familiak pasatzen duen denbora aproposa da horretarako.

Piramide nutrizionala edo elikagaien gurpila tresna garrantzitsuak dira gauzak ondo egiten hasi nahi badugu. Baina kontzientzia da landu behar duguna. Hori lortzen badugu, fresko gehiago eta enbasatu gutxiago erosiko dugu, sukaldean denbora gehiago pasako dugu, mahaian elkarrekin eseriko gara, kirol gehiago egingo dugu haurrekin, egarria dutenean ura emango diegu, eta erosketak egiterakoan informazio nutrizionala irakurri eta kritikoagoak izango gara. Hori da bidea!

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!