'Lur eta Amets', Euskal Herriko abentura filma zinemetara iritsi da

Karkara 2020ko ots. 14a, 08:30

'Hau bai abentura! Lur eta Amets' abentura filma zinemaz zinema dabil otsailaren 7az geroztik. Imanol Zinkunegik eta Joseba Poncek zuzendutako pelikulan, Lur eta Amets anai-arrebak Euskal Herriko garai ezberdinetan murgilduko dira Baltaxar katuarekin eta Amona Andererekin batera.

2015ean sortutako proiektua

Lur eta Amets proiektua 2015ean sortu zuten Ikastolen Elkarteak, Katxiporretak eta Elkar argitaletxeak, "gure herriaren historiaren irakurketa geure ikuspuntutik berreraiki eta eskuragarri jartzeko" asmoz, eta hori landu zuten ezagutza liburuarekin, ipuin sortarekin eta ondoren etorri zen galdera-erantzun mahai jokoarekin.

Zarautzen asteburuan

Pertsonaiek bizia hartu dute gero, eta Euskal Herria autobus magiko batean zeharkatu dute abendutik otsaila artean; guztira, hamaika geldialdi egin dituzte familia eta lagun artean "lur eta ametsen abenturak" partekatzeko. Donostian, Durangon, Arrasaten, Altsasun, Eibarren, Gasteizen, Getxon eta Iruñean izan dira, besteak beste, filmaren protagonistak, eta harrera ezin beroagoa egin diete antzoki eta areto guztietan. Orain, berriz, pantaila handira egin dute salto eta zinematan topatuko dituzte neska-mutikoek.

Zarauzko Modelo aretoan ikusgai izango da Hau bai abentura! Lur eta Amets filma, otsailaren 15ean eta 16an izango dira emanaldiak, 17:00etan.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!