Terrazak dituzten ostalariei neurriak zorrotz betetzeko deia egin die Udalak

COVID-19ak sortutako egoera dela-eta, terrazak jartzeko arauak malgutu egin zituen Orioko Udalak, ostalariei erraztasunak emateko. Atzo oharra eman zuten argitara, terraza daukaten ostalariei ezarritako neurriak zorrotz bete ditzaten eskatzeko.

Udalak jakitera eman duenez, deskonfinamendua bukatu arte aplikatuko dira arau malgu horiek, baina gogorarazi nahi dute ostalariek zorrotz bete behar dituztela neurri hauek:

  • Guztiz debekatuta dago terrazarekin oztopatzea garajeetako edo beste establezimenduetako sarrera-irteerak.
  • Oinezkoen pasabidea erabat libre utzi behar da (gutxienez, 2 metroko zabalera utzita).
  • Derrigor bete behar dira ostalaritzako ordutegiak, udal-ordenantzak adierazten duen bezala.
  • Segurtasun- eta higiene-neurriak zorrotz bete behar dira: mahaien desinfekzioa, pertsonen arteko segurtasun-distantzia, zerbitzarien autobabeserako materiala…
  • Egunaren bukaeran terrazek jasota gelditu behar dute.

Deskonfinamenduaren faseak bukatzen direnean, gaur egungo terrazen azterketa egingo du Udalak eta ez du onartuko neurriz gaineko terrazarik edo udal-ordenantza betetzen ez duen terrazarik.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!