Ikasurolaskota orientazio zerbitzuak ateak zabaldu ditu aurten ere

Prestakuntza mota guztien inguruko informazioa eskaintzen du, hezkuntza formala nahiz ez formala izan. Ikaslan Gipuzkoa sareak kudeatzen du zerbitzua, Urola Kostako Udal Elkarteko lanerako orientazio zerbitzuarekin elkarlanean. Zarauzko Gazte Informazio Bulegora jo dezakete interesdunek, astelehenetik ostiralera. Internetez ere ematen dute zerbitzua.

Gipuzkoako Lanbide Heziketako 27 ikastetxe biltzen dituen Ikaslan Gipuzkoa sareak kudeatzen du Ikasurolakosta, eta pasa den ikasturtean bezala, oraingoan ere, Urola Kostako Udal Elkarteko lanerako orientazio zerbitzuarekin elkarlanean eta Zarauzko
Udalaren laguntzarekin antolatu da, eta CIFP Monte Albertia LHII erreferentziazko ikastetxea izanda, zerbitzua Zarautzen eskainiko da.

Arduradunek jakinarazi dutenez, "prestakuntza mota guztien inguruko informazioa" eskaintzen dute orientazio zerbitzuan; hala nola, prestakuntza formala —DBH, Lanbide Heziketa, Unibertsitateko ikasketak, arte-ikasketak, Hizkuntza Eskola Ofiziala edo Lanbide Egiaztagiri bat—, prestakuntza ez formala —lan-munduan sartzeko edo lanpostura hobeto egokitzeko baliagarriak diren ikasketak, Egiaztagirien Katalogoan ez daudenak—, nahiz etengabeko ikaskuntza delakoa —norbere ongizatea lortzeko egiten dena", esaterako, kirola, eskulanak edota askotariko terapiak—.

Bereziki eskualdean eskuragarri dauden prestakuntza-moten inguruko informazioa lantzen du Ikasurolakostak. Dena den, Gipuzkoako Lanbide Heziketako ikastetxeetan hainbat ikastaro izango dira aurten, "lanerako prestakuntzarako", eta horien inguruan galdetzeko aukera ere izango dute orientazio zerbitzura jotzen dutenek.

Bulegoa, Zarauzko Zigordia kalean

Ikasurolakostaren helburua da "bizi osoko ikaskuntza sustatzea", arduradunen esanetan. Online, telefonoz zein posta elektroniko bidez eskaintzen du zerbitzua, baina baita aurrez aurre ere. Zarautzen, hain zuzen, Zigordia kaleko 34. zenbakira bertara daitezke interesdunak, Zarauzko Gazte Informazio Bulegoan baitu egoitza Ikasurolakostak.

Hona hemen bulegoko ordutegia:

  • Astelehenetik asteazkenera, 09:00etatik 14:00etara eta 15:00etatik 17:00etara.
  • Ostegunetan, 09:00etatik 17:00etara, baina ez da zuzeneko arreta zerbitzurik izango.
  • Ostiraletan, 09:30etik 14:30era.

Bertaratzeko asmoa dutenek, aldez aurretik hartu beharko dute hitzordua, 645 28 43 00 telefono zenbakira deituta edo ikasurolakosta@ikaslangipuzkoa.eus helbidera idatzita.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!