Eusko Jaurlaritzaren Osasun Sailak eman ditu atzo, asteazkena, egindako PCR eta antigeno proben emaitzak, eta eskualdean igoera izan da kasu positiboen kopuruan. Denera hamabi detektatu dituzte Urola Kostan, eta horietatik bat Orion izan da. Hala, gora egin du zertxobait herriko intzidentzia tasak, eta 179,39koa da gaur. Aiari dagokionez, ez dute kasu berririk izan azken orduetan.
Kasurik gehien Azpeitian zenbatu zituzten atzo; lau positibo, hain zuzen. Hori dela eta, 100.000 biztanleko hamalau egunetako tasak apur bat gora egin du, eta 216,82koa da gaur-gaurkoz.
Horrez gain, Azkoitian eta Getarian ere hiruna kasu zenbatu zituzten. Azkoitiaren kasuan, azken egunetako joera eten egin da, eta intzidentzia tasak baxua izaten jarraitzen duen arren, 91,80ra igo da. Getarian, berriz, lau egun pasatu ziren kasu berririk hautematen ez zutenetik, baina atzo zenbatutako hiru kasurekin 318,02ra igo da intzidentzia tasa.
Eskualdeko gainontzeko herrietan ez da aldaketa handirik izan. Zestoan kasu bana zenbatu dute, eta 590,65eko intzidentzia tasa du herriak. Zestoan dute oraindik ere eskualdeko tasarik altuena. Bestalde, Aizarnazabalen, Beizaman, Errezilen, Zarautzen eta Zumaian atzo ez zuten positiborik hauteman. Zarautzen eta Zumaiaren kasuan intzidentzia tasak beherantz jarraitzen du —102,80koa da Zarautzen ta 111,94koa Zumaian—, eta gero eta gertuago dute bi herriek eremu berdea.
Hego Euskal Herrian, 393 positibo
Hego Euskal Herrian, guztira, 11.170 PCR eta antigeno proba egin zituzten atzo Osakidetzak zein Osasunbideak, eta horietatik 393 pertsonak eman zuten positibo. Kasurik gehien Bizkaian atzeman zituzten (216), ondoren Gipuzkoan (78), Nafarroan (62) eta Araban (33). Horrez gain, Araba, Bizkai eta Gipuzkoatik kanpo bizi diren lau herritarrek ere eman zuten positibo. Bestalde, positibotasun tasa %3,5ekoa da Araba, Bizkai eta Gipuzkoan zein Nafarroan.
Ospitaleratzeei dagokienez, Osakidetzako erietxeetan, guztira, 262 pertsona daude COVID-19agatik ospitaleratuta, atzo baino bost gutxiago; ZIUn dauden herritarrak, berriz, 124 dira, atzo baino bi gutxiago. Osasunbideak ez du ospitaleratzeen berri eman.