Positibo bana atzeman dituzte azken orduetan Aian eta Orion

Amaia Urbieta Arruti 2021ko api. 7a, 13:54

Urola Kostan datuek okerrera egin dute nabarmen, herenegun baino hamazazpi positibo gehiago kontatu zirelako atzo: 38. Azkoitian eta Zarautzen atzeman dira positibo gehien, eta Azkoitia eremu gorrian sartu da.

Azken egunetako joera berretsi egin dute Osakidetzak plazaratu berri duen koronabirusaren bilakaeraren txosteneko datuek. Gorantz doa egunez egun COVID-19a duten pertsona kopurua, eta herenegundik atzora ez da edonolakoa izan jauzia eskualdean. Denera 38 kasu atzeman zituzten eskualdeko herrietan egun bakarrean, herenegun baino hamazazpi gehiago. Nolanahi ere, Aian eta Orion kasu bana atzeman dute, eta intzidentzia tasak apenas aldatu diren.

Eskualdean, berriz, daturik kezkagarrienak Azkoitia eta Zarauzkoak dira, izan ere,  atzo bost positibo berri atzemanda eremu gorrian sartu da Azkoitia. 400,57ko intzidentzia tasa du herriak orain, baina itxiera perimetrala ezarri beharreko herrien zerrenda datorren astelehenean eguneratuko denez, oraingoz, neurrietan ez du eraginik izango eremu gorrian sartu izanak.

Zarautzen, berriz, hamazazpi kasu atzeman dituzte egun bakarrean. Ia herenegun atzemandako kasuen bikoitza zenbatuta, eremu laranjan sartu da kostako herria. Gaur-gaurkoz, 329,81ekoa da intzidentzia tasa herri horretan, eta 278,41koa zen atzo. Getarian ere igoera nabarmena izan da: lau kasu berri zenbatu zituzten atzo herri horretan, eta intzidentzia tasa 459,36ekoa izatetik 600,71koa izatera igaro da egun bakarrean.

Eskualdeko gainontzeko herrietan ere gora egin dute kasuek eta 14 eguneko kasu metatuen tasak. Azpeitian lau positibo atzeman zituzten, herenegun baino bat gehiago, eta apur bat igo da tasa herri horretan (151,42tik 170,83ra). Zestoan eta Zumaian hiruna kasu atzeman zituzten atzokoan, bietan aurreko egunetan baino gehiago. Zumaian gora egin du intzidentzia tasak; 234,05etik 244,23ra igo da. Zestoan, berriz, 256,81ean mantendu da.

%7,9ko positibotasun tasa

Herenegungo datuei erreparatuta, behera egin du Araba, Bizkai eta Gipuzkoako positibotasun tasak. Atzo %8,7koa zen, eta gaurko datuekin %7,9koa da. 9.247 proba diagnostiko egin zituzten guztira, eta horietatik 731k eman zuten positibo hiru lurralde horietan.

Ospitaleetako datuak gazi-gozoak dira. Azkenaldian izandako ospitaleratze gehien izan ziren atzokoan: 66; eta ospitaleratuta dauden lagunen kopurua igo egin da apur bat: 364tik 369ra. Zainket Intentsiboen Unitateari dagokionean, ordea, jaitsi egin da apur bat bertan dauden pertsonen kopurua, oraindik oso altua izaten jarraitzen duen arren: 105 ziren herenegun, eta 100 atzo.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!