Gora egin dute Aiako eta Orioko intzidentzia tasek

Positibo bana atzeman dute Aian eta Orion, azken orduetan. Hala, intzidentzia tasa 130, 46koa da Orion eta Aian 50,38koa.

Eusko Jaurlaritzako Osasun Sailak duela minutu gutxi jakinarazi du txosten bidez, atzo, asteazkena, PCR eta antigeno testetan herriz herri zenbat kasu positibo atzeman zituen. Datuen arabera, Urola Kostan 29 positibo baieztatu zituzten, bana Aian eta Orion. Hala, Aiako eta Orioko intzidentzia tasek gora egin dute azken orduetan. Orion 130, 46koa da eta Aian 50,38koa. 

Eskualdeko positiboen herena Azkoitian zenbatu dute. Han hamar positibo jakinarazi ditu Osasun Sailak, eta 175,25eko intzidentzia tasa du gaur-gaurkoz. Duela bi egun Araba, Bizkai eta Gipuzkoako 5.000 biztanleko herrien artean egoera onena zuen herria zen Azkoitia. 

Zumaia, Zarautz, Azpeitia eta Aizarnazabal artean hauteman dituzte gainerako positiboak. Zumaian zortzi positibo zenbatu dituzte, Zarautzen sei, Azpeitian bi eta bat Aizarnazabalen. Intzidentzia tasari dagokionez, Zumaian dute daturik okerrena. Eremu gorrian sartuta jarraitzen dute han, 732,68ko tasarekin. Zarautz, Azpeitia eta Orio dira eremu horian daude eskualdeko beste herri nagusiak; Zarautzen 248,43ko tasa dute eta 223,39koa Azpeitian. Aizarnazabalen –260,08– ere intzidentzia tasak gora egin du herri bakoitzean positibo bana zenbatuta. Zestoan, bestalde, 154,08koa da datu horren zenbatekoa.

Positiboak gora, ospitaleak egonkor

Hego Euskal Herrian ere datuak mardulak dira gaurkoan. 900 positiboko langa –905 positibo zehazki– gainditu zen atzoko egunean Bizkaiko 294, Gipuzkoako 260, Nafarroako 256, Arabako 62 eta lau lurralde horietatik kanpo bizi diren 33 kasu positiborekin. Nafarroako positibotasun tasak altua izaten jarraitzen du egun. 1.811 PCR eta antigeno test egin zituzten eta tasa %14,1ean kokatu zen. Araba, Bizkai eta Gipuzkoan, bestalde, %7an dago positibotasun tasa 9.260 proba egin ondoren.

Positiboak gora egiten ari diren arren, oraingoz Osakidetza ez da ospitaleetan gaixoak pilatzen ari. Izan ere, zainketa berezia behar duten pertsonak 25 dira gaur, atzo bezala. Hemezortzi pertsona ospitaleratu zituzten atzo Osakidetzaren mendeko erietxeetan, eta egun 50 lagun dira ospitalean daudenak, atzo baino bat gutxiago. Gaixotasunaren zabalkundea adierazten duen oinarrizko birsorkuntza tasa edo R0 indizeak, berriz, behera egin du, eta 1,45ean dago gaur. Araba, Bizkai eta Gipuzkoako intzidentzia tasak 21 puntu egin zuen gora atzo, eta 224,71koa da gaur-gaurkoz.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!