Eusko Jaurlaritzako Osasun Sailak argitara eman berri duen txostenaren arabera, Orion kasu positibo bat atzeman zuten atzo, astelehenean. Hala, zertxobait gora egin du herrian intzidentzia tasak, 48,92tik 65,23ra. Aian, beste egun batez, ez zen kasu berririk izan atzokoan, eta 100,76an jarraitzen du kasu metatuen tasak.
Eskualdeko herrietan, guztira, hamar koronabirus kasu hauteman zituzten atzo. Kopuruak handiak ez diren arren, Orion bezala, gora egin dute intzidentzia tasek hainbat herritan. Azkoitian, esaterako, lau positibo zenbatu zituzten atzo, eta igo egin da apur bat bertako intzidentzia tasa: 267,04ra, hain zuzen ere. Azpeitian bi kasu berri atzeman zituzten, eta herri horretan 243,10era igo da tasa.
Zarautzen eta Zumaian bi eta bat kasu zenbatu zituzten atzo hurrenez hurren, baina herri horietan behera egiten jarraitzen du intzidentzia tasak. 102,8koa da Zarautzen, eta 193,34koa da Zumaian. Eskualdeko gainontzeko herrietan ez zuten kasu positibo berririk atzeman.
Zainketa intentsiboek, arintzera
Osakidetzak eta Osasunbideak emandako datuen arabera, Hego Euskal Herrian atzo egin ziren 7.475 proben artean 316k eman zuten positibo. Araba, Bizkai eta Gipuzkoan nabarmen egin du behera positibotasun tasak: %4koa da gaur eta %5,7koa zen atzo. Nafarroan, berriz, igo egin da: %4,4koa zen atzo eta %5,3koa gaur. Dena den, duela aste batzuetako tasarekin erreparatuta, nabarmen jaitsi da adierazlea Hego Euskal Herri osoan.
Ospitaleetatik ere berri onak datoz. Osakidetzaren ardurapeko erietxeetan 38 ospitaleratze berri izan ziren atzo, baina COVID-19aren eraginez zainketa bereziak behar dituzten pertsonen kopuruak behera egin du. 62 lagun daude Araba, Bizkai eta Gipuzkoako ZIUetan, atzo baino bederatzi gutxiago. Nafarroan, berriz, 22 dira zainketa intentsiboak behar dituzten gaixoak eta, denera, 69 dira COVID-19aren eraginez ospitaleratuta daudenak.