Eremu berdera igarotzetik gertu dago Orio

Atzo ez zuten kasurik atzeman ez Aian ez Orion. Araba, Bizkai eta Gipuzkoako intzidentzia tasa 100eko langara hurbildu da, dena den. 

Eusko Jaurlaritzako Osasun Sailak duela minutu gutxi emandako datuen arabera, atzo, asteazkena, ez zen kasu positiborik izan ez Orion ez Aian. Orion 114,16tik 97,85era egin du behera intzidentzia tasak, eta eremu berdera igarotzetik hurbil dago herria. Aiak, ordea, Urola Kostako intzidentzia tasarik altuena du egun, 957,18.

Eskualdean, guztira, hiru kasu positibo baieztatu zituen atzo Osasun Sailak: bi kasu hauteman zituzten Zarautzen eta bat Azpeitian. Halere, bi herrietako kasu metatuen tasak behera egin du. 119,93ko intzidentzia tasa dute Zarautzen –124,21ekoa zen atzo– eta 223,39koa Azpeitian –236,53 zen atzo–. Azpeitiak du egun 5.000 biztanletik gorako eskualdeko herrien artean intzidentzia tasa altuena.

Jaitsi egin da intzidentzia tasa Zumaian ere, 111,94tik 81,41era. Azkoitian eta Zestoan, berriz, tasa bere horretan mantendu da, 183,59ko eta 128,40ko tasekin, hurrenez hurren. Aizarnazabalen, Beizaman, Errezilen eta Getarian, ostera, hutsean dute intzidentzia tasa.

104 lagun ospitalean

Hego Euskal Herrian nabarmen ari da egiten hobera pandemia azken egunetan. Nafarroako Gobernuko Osasun Sailak pandemia amaitutzat eman zuen atzo lurraldean; Araba, Bizkai eta Gipuzkoako intzidentzia tasak, bestalde, beste bost puntu egin du behera, 104,06an kokatuz. Azken hiru lurralde horietan atzo, asteazkena, 120 kasu positibo atzeman zituzten. 23 positibo zenbatu zituzten Araban, 66 Bizkaian, 24 Gipuzkoan eta zazpi lurralde horietatik kanpo. Araban, Bizkaian eta Gipuzkoan 6,827 PCR eta antigeno test egin zituzten atzo, eta hori horrela, %1,8ekoa da positibotasun tasa. Nafarroan, berriz, hemezortzi kasu detektatu zituzten 1.603 proba egin ostean, eta %1,1ekoa da positibotasun tasa.

Ospitaleetan egoera gero eta hobeagoa da. Osakidetzaren mendeko erietxeetan 104 lagun daude ospitaleratuta gaur-gaurkoz –atzo 28 lagun ospitaleratu zituzten–. Ospitaleratzeen inguruan gaur eman duen datua, gainera, irailaren 9az geroztik Osasun Sailak eman duen baxuena da. Halaber, ZIUetako okupazioa mantso, baina beherentzat doa. Egun 49 lagun daude larri gaixorik zaintza berezietan. Osasunbideak emandako datuen arabera, aldiz, 44 lagun daude Nafarroan erietxeetan eta hamahiru herritar ZIUn.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!