UKUE Urola Kostako Udal Elkarteko lehendakari Lourdes Salsamendi Goñik eta Gloria Vazquez Herranz Zarauzko alkateordeak proiektu baten berri eman dute prentsa ohar bidez. Azaldu dutenez, coworking espazioak sortzeko proiektua lantzen ari da UKUE.
2021eko aurrekontuetan “adostasunez” jasotako proiektua dela azpimarratu dute, eta helburua dela eskualdeko herritarrentzako lanerako tresna izatea. “Bultzada bat eman nahi diegu negozio-ideia bat izan eta aurrera eraman nahi duten ekintzaileei eta dagoeneko abian direnei», esan du Vazquezek.
Salsamendik zera gaineratu du: “Urola Kostako Udal Elkartean etengabe ari gara lanean enpleguaren alde, herritarren bidelagun izan nahi dugu, behar dutenean gure laguntza izan dezaten. Coworking proiektua pauso handia izango da bide horretan, aholkularitzatik eta laguntzatik haratago doalako. Coworkingak ekarriko du bide berean dauden herritarren arteko elkarlana eta sinergia; proiektuak garatu eta aurrera eramateko espazioa izango da”.
Gainera, UKUEk balioan jarri nahi du proiektu horretan emakumeek izango duten presentzia, “hasiera-hasieratik erdigunean jarrita”.
Oraingoz, ez dute azaldu proiektuaren garapena zer fasetan dagoen, eta noiz egongo liratekeen martxan espazio horiek.