Herri kirol jaialdia izan zen atzo, astelehena, Azpeitiko Izarraitz pilotalekuan. Aizkolariak, harri-jasotzaileak zein trontzalariak izan ziren protagonista. Batetik, Izar Berriak aizkolari txapelketa berriaren bigarren eta azken jardunaldia jokatu dute; eta bestetik, Binakako Harrijasotze Txapelketaren nahiz Emakumeen Trontzalari Txapelketaren bigarren jardunaldiak. Aizkoran aritu zen Andoni Iruretagoiena Izeta VI.a eta hirugarren egin zuen; eta harri-jasotzen aritu zen Hodei Iruretagoiena Izeta IV.a, Beñat Telleria bikotearekin, eta bigarren bukatu zuen.
Basaurin (Bizkaia) jokatu zuten Izar Berriak txapelketaren lehen jardunaldia, eta atzo, Azpeitian jokatu zuten bigarrena eta azkena. Bi jardunaldietako denborak kontuan hartuta, Txomin Amundarain eta Ibai Soroa izan ziren txapelketako irabazleak. Hala eta guztiz ere, Azpeitiko jardunaldia Suharri Rodriguez eta Jokin Urretabizkaia Basozabal aizkolariek irabazi zuten; izan ere, bikoteak 17 minutu eta 4 segundo behar izan zituen gaur lanak amaitzeko. Amundarainek eta Soroak, berriz, sei segundo gehiago –17 minutu eta 10 segundo– behar izan zituzten gaur. Azpeitiko eta Basauriko lanetako denborak batuta, Amundarainek eta Soroak 32 minutu eta 8 segundo behar izan zituzten; Rodriguezek eta Basozabalek, berriz, hogei segundo gehiago –32:28– behar izan zituzten.
Txapeldunez eta txapeldunordeez gain, beste lau bikotek ere parte hartu zuten txapelketan: Hodei Ezpeletak eta Andoni Iruretagoiena Izeta VI.ak –hirugarrenak, 33:37–, Oier eta Xuban Kañamaresek –laugarrenak, 35:09–, Julen Olanok eta Julen Gabirondok –bosgarrenak, 36:24– eta Joxean Etxeberriak eta Axel Larrañagak –42:16– .
Harri-jasotzea eta trontza
Binakako Harrijasotze eta Emakumeen Trontzalari txapelketen bigarren jardunaldiak ere jokatu zituzten gaur Azpeitian. Harrijasotze txapelketan Mikel Lopetegi Urra eta Iñigo Eizagirre Eiza nagusitu ziren Azpeitian. Bikote irabazleak 11.664 kilo altxatu zituen Izarraitzen, eta Beñat Telleriak eta Hodei Iruretagoiena Izeta IV.ak osatutako bikoteak 11.039 kilo. 150 kiloko laukizuzena, 125 kiloko kopa, 113 kiloko kubikoa eta 100 kiloko bola altxatu zituzten laurek txanda ezberdinetan.
Emakumeen Trontzalari Txapelketan, berriz, Maria eta Ainhoa Iraizoz aritu ziren alde batetik, eta bestetik, Uxue Rodriguez eta Nerea Uharte. Iraizoztarrek 10 minutu eta 5 segundo behar izan zituzten 36 ontzako enborra hamasei aldiz mozteko. Rodriguezek eta Uhartek, berriz, 11 minutuan amaitu zuten lana.
(Argazkiak: Ibon Errazu)