Orion 27 kasu detektatu dituzte azken hiru egunetan, eta Aian 20

Intzidentzia tasa 2.772,34 da Orion, eta Aian ere gora egin du 2.670,03raino. Bi herrietako datuek txarrak izaten jarraitzen dute.

Ohi baino beranduago bada ere, Eusko Jaurlaritzak argitaratu berri ditu azken hiru egunetan egindako PCR eta antigeno proben emaitzak, eta datuek baieztatzen dutenez, koronabirusaren oldarraldiak ez du etenik. Orio eta Aiari dagokienez, 27 eta 20 kasu detektatu dituzte bi herrietan, hurrenez hurren. Oriok 2.772,34ko tasa du gaur gaurkoz. Aiaren zifra ere handia da: 2.670,03.

Eskualdean 450 kasu positibo hauteman dituzte azken hiru egunetan, eta Urola Kostako herri ia guztietako intzidentzia tasek gora egin dute, horietako batzuetan, gainera, nabarmen.Kasu kopuruari dagokionez, Azpeitian izan dira azken hiru egunetan kasurik gehien: 112. Hori dela eta, 100.000 biztanleko azken hamalau egunetako intzidentzia tasak gora egin du berriro, eta 2.503,29an kokatu da. Gertu izan du Zarautz, han 106 kasu hauteman baitituzte; hala eta guztiz ere, han intzidentzia tasaren igoera ez da hain handia izan, 1699,15etik 1781,81era igo baita. Azkoitian ere etenik gabe goraka jarraitzen dute kasuek, eta 84 izan dira azken hiru egunetan. Intzidentzia tasak ere gora egin du han, eta 1852,62an kokatu da, bi milako langatik gertu.

5.000 biztanletik gorako herriekin jarraituz, Zumaian 52 kasu zenbatu dituzte, eta 1,882,17ra igo da tasa metatua. Bestalde, herri txikietan ere igoera izan da ia leku denetan: Zestoan 35 kasu izan dira, eta 3.312,79koa da tasa; Getarian sei kasurekin 1.342,76ra igo da tasa; Errezilen bost kasu zenbatu dituzte eta 1.610,31ko tasa dute, eta Aizarnazabalen hiru kasu hauteman dituzte eta 1.170,35ekoa da tasa. Beizama izan da eskualde osoan azken hiru egunetan kasurik izan ez den herria.

Marka berriak hausten

Eskualdeko datuak Hego Euskal Herriko joeraren islada dira, eta horren erakusle da Araban, Bizkaian eta Gipuzkoan hautsi den marka berria. Izan ere, egun bakar batean 4.700 emaitza positibo izan dira PCR eta antigeno probetan, bezperan atzemandakoak baino 1.156 gehiago. Positibotasun tasari dagokionez, berriz, %19,1ekoa izan da, 24.832 proba egin baitziren atzo. Lurraldez lurralde, 14 eguneko intzidentzia metatua 1.824 kasukoa da Gipuzkoan, 1.478koa Araban eta 1.257 kasukoa Bizkaian. Nafarroan ere marka berria hautsi dute, eta atzo egindako probetatik 1.611 izan ziren emaitza positiboa izan zutenak, eta positibotasun tasa %22,9koa da; inoiz ez da halako daturik atzeman. 

Arabako, Bizkaiko eta Gipuzkoako ospitaleetan, bestalde, duela hiru egun baino egoera zertxobait hobea dute, baina oraindik 386 eri daude ospitaleetan, eta horietatik 101 dira ZIUetan daudenak. Nafarroan, berriz, 169 dira ospitaleetan dauden eriak, eta horietatik 25 daude ZIUetan.

Maskara derrigorrezkoa

Koronabirusaren hedapena ikusita, Pedro Sanchez Espainiako presidentearekin bildu ziren atzo autonomia erkidegoetako presidenteak, eta han erabaki zutenez, aire zabalean maskara janztea derrigorrezkoa izango da gaurtik aurrera —gaur onartu du lege dekretua Espainiako Ministroen Kontseiluak—. Iñigo Urkullu lehendakariak eta Maria Txibite presidenteak, momentuz, ez dute aldaketa gehiagorik iragarri Gabonetarako, baina hainbat hedabidek iragarri dutenez, pandemiari era koordinatuan aurre egiteko zenbait neurri aztertzen ari dira biak.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!