Eskualdeko langabeak kontratatzeko dirulaguntzak emango dizkie udal elkarteak enpresei

Guztira, 312.000 euro bideratuko ditu UKUEk laguntza hauetara. Urtarrilaren 31 izango da eskabideak aurkezteko azken eguna.

Urola Kostako Udal Elkarteak dirulaguntzak emango dizkie eskualdeko enpresei langabeen kontratazioa errazteko. Guztira, 312.000 euro bideratuko ditu horretara. Ekimen hau enplegua sustatzeko 2021eko planaren barruan kokatzen eta Lanbide-Euskal Enplegu Zerbitzuak finantzatuko du.

UKUEk ohar baten bidez azaldu duenez, COVID-19ak eragindako pandemiak egoera ekonomikoa erabat aldatu eta “aurrekaririk gabeko shock ekonomikoa” eragin du. Egoera honetaz jabetuta, udal elkarteak lehentasunezkotzat jotzen da enplegua indartzeko neurriak ezartzea. Gaineratu duenez, deialdi honen helburua  bikoitza da: alde batetik, enpresei laguntzea langileak kontratatzeko gastuei aurre egiten eta, beste alde bestetik, enplegu-politika aktiboak indartzea, langabeen kontratazioa errazteko. 

Deialdi honetan lehentasuna izango dute emakumeak kontratatzen dituzten eskabideek. izan ere, 23 diru laguntza gordeko dira emakumeak kontratatzen dituzten eskabideentzat.

Diruz lagunduko diren kontratuek ezaugarri batzuk izango dituzte. Kontratuen iraupena hiru edo sei hilabetekoa izango da; lana %50 edo 100ekoa, eta epealdia 2021ko apirilaren 1etik abenduaren 31ra arte. 3.000 eta 9.000 euro areko dirulaguntzak izango direla jakitera eman du UKUEk, kontratuaren eta kontratatzen den pertsonaren ezaugarrien arabera. 

Eskabideak Udal Elkartearen egoitza elektronikoaren bidez aurkeztuko dira. Oinarriak eta eskabideak egiteko ereduak nahiz zuriketak egiteko eredu eta eranskinak eskura daude Udal Elkartearen webgunean.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!