2022. urteak askotariko albisteak utzi ditu Aian eta Orion; batzuk onak, besteak txarrak. Eta horien guztien berri eman du Karkara.eus-ek joan berri den urtean ere. Askotariko albisteak, bideoak, erreportajeak nahiz elkarrizketak ondu ditu Karkarak 2022an ere, eta hainbat izan dira Komunitatearen bidez ekarpenak egin dituzten herritarrak eta eragileek ere. Guztira, 2.731 albiste argitaratu ziren webgunean iaz, zazpi albiste egunean batez beste, eta asko izan dira horiek irakurri dituzten herritarrak –hona hemen iazko hamar albiste irakurrienen zerrenda–.
2022ko urtarrilaren 1etik abenduaren 31ra bitartean 479.012 bisita izan ditu Karkara.eus-ek. Google Analytics neurgailuak emandako datua da hori. Urtez urte hazten jarraitzen du Karkararen webguneko bisiten kopuruak, eta iazkoa ere ez da salbuespena izan; izan ere, 2021ean baino 17.042 bisita gehiago izan ditu Karkara.eus-ek urtebeteko epean. Datu hori kontuan izanik, egunean, batez beste, 1.312 bisita izan ditu webguneak. Bestalde, aipatzekoa da irakurleek webgunean zabaldutako orri kopurua ere: 2022an, orotara, 980.825 orri ireki zituzten horiek, eta egunean, batez beste, 2.687 orri. Azpimarragarria, baita ere, erabiltzaile bakoitzak, batez beste, hiru minutu eta erditik gora igaro zituela Karkara.eus-era egindako bisita bakoitzean.
Joerak azken urteetako berbera izaten jarraitzen du. Izan ere, Interneteko edukiak eskuko telefonotik irakurtzeko joera areagotzen ari da urtez urte, eta 2022a ere ez da salbuespena izan zentzu horretan. Karkara.eus-en kasuan, 2016a inflexio puntua izan zen: lehen aldiz, bisiten erdia baino gehiago (%51,83) eskuko telefonoetatik egin zituzten herritarrek. Iaz, berriz, herritarren %75,8k erabili zuten eskuko telefonoa Karkara.eus irakurtzeko. Aldiz, ordenagailutik eta tabletetatik egindako bisiten kopuruak %24,6 eta %1,8 izan ziren, hurrenez hurren.
Urolako Komunikazio Taldea (UKT) osatzen duten hedabide digitalen datuak izugarriak izan dira 2022an. Taldearen webguneetan albiste ugari argitaratu ziren iaz, eta asko izan dira horiek irakurri dituzten erabiltzaileak. Hain zuzen ere, taldea osatzen duten sei webguneek –Uztarria, Maxixatzen, Baleike, Karkara, Zarauzko Hitza eta Urola Kostako Hitza– 9.174.112 bisita izan zituzten iaz, 2021ean baino 518.784 bisita gehiago.