Asteburuan bost kasu berri atzeman dituzte Orion eta hiru Aian

Erabiltzailearen aurpegia Karkara 2020ko abe. 14a, 14:41

Nabarmen egin dute gora atzemandako positibo berriek Urola Kostan: ostiralean 28 emaitza positibo izan ziren, larunbatean 41 eta, atzo, 14. Dena dela, Orio eremu horira igaro da.

Osasun Sailak argitara atera ditu joan den asteburuko datuak, eta nabarmena izan da igoera atzemandako positiboen kopuruan. Urola Kostan, orotara, 83 lagunek eman dute positibo ostiraletik igandera bitartean egindako PCR eta antigeno probetan. Aurreko asteburuan 35 izan ziren, 48 gutxiago. Herriz herrikako datuei erreparatuz, bost kutsatu berri izan dira Orion, eta hiru Aian.

Azpeitian eta Zarautzen zenbatu dituzte kasu gehien: 33 Azpeitian –hamahiru ostiralean, hamazazpi larunbatean eta hiru igandean– eta 24 Zarautzen –bost ostiralean, hamalau larunbatean eta beste bost igandean. 571,24ko intzidentzia tasa metatuarekin, eremu gorrira igaro da Azpeitia –ostegunean atzemandako hamaika kasu berriekin, 405,18koa zen tasa–. Hortaz, Eusko Jaurlaritzak aurreko astean indarrean sartutako neurri eta irizpide berrien arabera, Azpeitiko ostalaritza lokalek ateak itxi beharko dituzte berriz, 500eko langa gainditu baitu herriko positibotasun tasak.

Zarautzen ere kolorez aldatu da semaforoa: 360,50eko positibotasun tasarekin, eremu laranjan sartu da berriz. Osteguneko datuekin, 442,04koa zen zenbatekoa, eta eremu horian zegoen Zarautz.

Azkoitian ere izan da igoera baieztatutako kasuen kopuruan: hamaika positibo detektatu dituzte –bost ostiralean, hiru larunbatean eta hiru igandean–, eta 266,91ko intzidentzia tasarekin, eremu horian dago une honetan. Dena den, ez da kolore hori piztuta duen eskualdeko herri bakarra: Orion bost positibo atzeman dituzte asteburuan eta eremu horira igaro da, eta berdin gertatu da Zumaian, ostiraletik igandera bitartean zenbatutako lau kasu berriekin.

Aian hiru lagunek eman dute positibo asteburuan, bik Zestoan, eta batek Getarian. Aizarnazabalen, Beizaman eta Errezilen, aldiz, ez dute kasu bat bera ere atzeman.

Kasuek gora Araban, Bizkaian eta Gipuzkoan

Koronabirusa hautemateko 21.975 egin dituzte asteburuan Araban, Bizkaian eta Gipuzkoan. Aurreko asteburuko datuekin alderatuta, lurralde historiko guztietan egin dute gora zenbatutako kasu positiboek: 296 izan dira Araban, 658 Bizkaian eta 473 Gipuzkoan. Dena den, ostiraletik igandera artean jaitsi egin da hiru lurraldeei dagokien positibotasun tasa: %7,2koa izan zen ostiralean, %6koa larunbatean eta %6,1ekoa igandean.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!