Itsas txoriek ez dute arazorik izaten lehorrera etortzeko, itsasoan barrena oso urruti egonda ere. Senak ekartzen ditu. Baina zerbaitengatik txori horietako batzuk sena galdu eta noraezean hasten dira. Lehorrera itzuli nahi, baina okerreko bidea hartu eta, larritasunak eraginda, azkartu egiten dute hegaldia, okerreko bidetik, eta hegazkada bakoitzean urrutiago daude helburutik, zenbat eta urrunago lehorreko kabitik orduan eta hurbilago itsasoan betiko itotzetik.
Bernardo Atxagak aspaldi erabilitako metafora ekarri dit gogora azken hilketak. Atxagak ere zentzurik gabeko hilketa hauek salatzeko erabili zuen. Lehengoan Fermin Muguruzak ETBn esanda dakit Mikel Laboarekin batera kantatu zutela biek Ernest Lluch-en hiketaren kontra antolatutako jaialdian. Gaur bertan, ostirala, honelako galderak egiten ditu Anjel Lertxundik Berrian: “Zertarako, ez baldin bada soil-soilik beste hildako bat eransteko orain arteko zerrendari? Zein jainko uste du dela nork inori ordua iritsi zaiola erabakitzen duenak? Zerk minbizitzen du sen naturala, metastasia gure gorputz sozial osora barreiatzeraino?”. Benitok aspaldi iragarri zuen: “zer egingo degu? Alkar hil” eta oraindik horri erantzuten segitzen du, kontzertuz kontzertu, ahotsa urratu arte: “hori ez, hori ez…”.
“Azpeitian ahalegin handia egin dugu politika aurrerakoiak abia zitezen adostasunak lortzeko, baina ETAk zapuztu egin du ezkerrekoak eta abertzaleak sentitzen garenon elkarlana”; horixe adierazi du Azpeitiko udaletxeko Aralarreko zinegotziak, udal gobernua uzteko hartu duen erabakia azaltzean, “herrigintzarako lanean ez dugu onartuko inondik inora esku-hartze militarrik.”
Abiadura Handiko Trenaren kontra diharduten hainbat talde ekologistak garbi adierazi dute haien borrokak ez duela onartzen hilketarik, helburuak ez duela zilegi egiten inola ere heriotza dakarren ekintzarik eta, gainera, jendea urruntzeko besterik ez duela balio.
Atzo, ostegun eguerdian, lan ordua zela, ehunka oriotar elkartu ziren plazan isiltasunaren bidez hilketa gaitzesteko.
Zein bestek esan behar dizue aski dela? Noiz konturatuko zarete Itaka urruntzen ari dela ekintza horietako bakoitzean, sena galduta, okerreko bidetik, urruntzen ari garela askatasunetik eta independentziatik?
Heriozko jokabide honetan sena Paris baino askozaz ere urrunago dagoela ematen du, txoria bezala, gu bezala.
Iñaki Iturain