Gelajauziak Kukai dantza taldeak Cesc Gelabert koreografo katalanaren laguntzaz ekoiztutako azken lana izan genuen ikusgai igandean Aiako plazan. Lanak bertsio laburtu bat badu, baina Basterretxearen Akelarre artelanaren baitan sortutako erritu dantza kutsu nabariko lana, bere osotasunean, ekarri zuten Aiara. Sorginak baino gehiago ziren aztiak. Guztiak ere jolaskerietan abilak direla erakutsiaz, indarra, boterea, anbizioa zein zorroztasunaren pareko ekintza, ahots eta jarrerekin aurkeztu zuten koreografia ere.
Euskal Dantzetako teknika eta kode tradizionalari fidel mantenduz, mugimendu libre eta pertsonalaren bilaketa ariketa egin du urteetan Kukaik. Ariketa horrek bere lanen narratibak eta formak Euskal Dantza Tradizionalaren errepertoriotik desberdintzen ditu. Gelajauziak lanean sorginek zein aztiek jarrera berak eta jantzi beretsuak jantzita elkarrekin dantzatzen dute.
XX. mendearen lehen erdian Dantza klasikoaren kodeekiko fideltasuna gordeaz forma eta narratiba berriak sortzeko joera edo aroa neoklasiko bezala izendatu zen (Serge Lifar, 1949). Euskal dantzen kodeei fidel mantendu, baina etengabe berregiteko joera hau nola da izendatua? Euskal dantza neotradizionala?