Euskaraldia

Erabiltzailearen aurpegia

Joan den ostiralean hasi genuen Euskaraldia eta dagoeneko laugarren eta azken luzean sartuta gaude. Zenbait, nekatuta, helmugara iristeko amorratzen egongo dira; beste batzuk, ordea, penatuta, bideaz gozatzen ari direlako. Txanponaren bi aldeak.

Oraindik balorazioak egiteko garaia iritsi ez bada ere, egun hauetan bizitakoak ekarri nahi ditut hona. Hasteko, txapa bat ez da nahikoa niretzat. Nonahi ahaztuta uzten dut eta zailagoa egiten ari zait non utzi dudan gogoratzea, euskaraz lehen hitza egin eta euskarari eustea baino. Bigarrenik, kalean, ahobizi eta belarriprest ikurren bila nabilela konturatu naiz, ia obsesio bihurtzeraino. Begiak eta belarriak zorroztu eta burua galderaz bete zait: txapa paparrean al darama? Euskaraz ari al da?

Egia esan, sorpresa atseginak bestelakoak baino gehiago izan dira. Azkenik, eta niri dagokidanez, zenbait jarrera aldatzeko balio izan dit, Oriotik kanpo batez ere. Lantokian, askok gaztelerara jotzeko joera handia dute eta ni ere askotan erori izan naiz. Hirira joandakoan ere, saltokietan erdaraz egin izan dut lehen hitza, euskara ulertuko ez dutelakoan.

Euskaraldiak joera horiek aldatzen eta aurreiritziak alboratzen lagundu dit behintzat. Bada zerbait!

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!