E Egunkaria. Euskaraz. Bakarra. Ezinbestekoa. Estrategikoa. Militantzia. Profesionaltasuna. Kalitatea. Txikia. Handia. Ezezaguna.
S Sarekada. Operazioa. Erasoa. Gauez. Azpikeriaz. Estatuaren terrorearen antzezpena. Ustekabea. Izpi infragorriak buruan. Izua. Umiliazioa. Indefentsioa. Euskal Herrian amesgaiztoek kolore berdea dute maizegi.
K Kemena. Langileena. Egunero. Malkoak xukatzeko denborarik gabe, Egunkariak segida izan zuen. Jota. Beldurtuta. Kezkatuta. Itxia, baina ez isildua. Harro.
E Erantzuna. Elkartasuna. Etxean. Kalean. Bakarka. Taldean. Amorruak mundu bat bildu zuen Donostian. Eskerrik asko.
R Erreakzioak. Salaketa. Gehienak beroak; batzuk epeletik behera; eta baten bat oso hotz: onartezina, koldarra, zitala eta zikina izan zen Miren Azkaratek Eguneron argitaratutako iritzia.
R Erantzuleak. Jose Maria Aznar, Angel Acebes, Mariano Rajoy —lehendakariorde zen—, Juan del Olmo, Guardia Zibila... Operazioak bultzada politikoa izan zuen. Nola bestela?
I Inkomunikazioa. Izua. Inpunitatea. Torturak. Martxelo Otamendi Soto del Realgo espetxetik atera berritan, telefonoaren beste aldean, hitz egin ezinik.
K Katalunia. Egunkaria Katalunian argitaratu balitz bezala erantzun zuten. Gauza bera egingo al genuke guk Kataluniako komunikabide bat itxiko balute? Orain agian bai; lehen ziurrenik ez. Gràcies.
A Auzi ekonomikoa. Eskandalua. Itxiera zuritzeko azken heldulekua.
S Sostengua. Sosak. Egunkaria herritik jaio zen, eta baita haren ordezkoa, Berria, ere. Crowdfundinga asmatzerako ondo genekien zer zen auzolana, elkartasuna eta musu-truk lan egitea.
K Kaltea. Neurtezina. Konponezina. Auzipetuena, senideena, lagunena, langile ohiena, irakurleena, euskararena, demokraziarena, justiziarena...
O Ordaina. Ez dago kalte ordainik egindako kaltea berdinduko edo arinduko duenik. Era berean, ez dago ordainik jasotako elkartasunaren zorra kitatuko duenik. Eskerrik asko. Maite zaituztegu. Behar zaituztegu.
E Euskal Herria. Egunkaria’ nazionala zen. Joxe Azurmendik esana: Egunkariak horrela —zuri eta niri— herri bat ematen digu, bestela edonon ukatuta daukagun herri hori. Bainazela, esaten dit egunero. Esaten dizu.
Z Zintzotasuna. Independentzia. ‘Egunkaria’ objektiboa al zen? Ez. Subjektiboa, baina zintzoa.
A Auzipetuak. Bidegabekeriaren eta duintasunaren sinbolo.
H Hildakoak. Bidegabekeriaren urte luzeetan joan dira Luis Goia, Inma Gomila, Joxean Lizarribar eta Martin Ugalde.
A Auzitegiak. Guardia Zibilaren eta haren gehiegikerien konplize. Tresna. Auzia amaitu da, baina injustizia ez.
Z Zauriak. Kostako zaie orbantzen. Xalotasuna galdu genuen.
T Testigantza. Memoria. Errelatoa. Memoria. Egunkaria auziak izan behar du errelatoaren parte. Ez ahazteko modukoa da. Ez da ahaztu behar.
U Urdina. Gure historiako eta bizitzetako unerik beltzenetakoaren kolorea; baina baita bidegabekeriari emandako erantzunarena ere. Kamiseta soil batek guztia biltzen du: Egunkaria aurrera!