Hizkuntza minorizatuen bizi dilema, ez da euskararena soilik. 5000 hizkuntza inguru daude mundu osoan, eta horietatik gehien-gehienak desagertzeko zorian daude. Garabide elkarteak esperientzia trukeak egiten ditu Latinoamerika eta beste zenbait herrietako pertsonekin. Hangoek hango hizkuntza minorizatuen osasunaren berri ematen diete, eta Garabidekoek euskara biziberritzearen klabeak zeintzuk izan diren ezagutarazten saiatzen dira. Horretarako, hiru alditan, Hizkuntza Biziberritzeko Estrategiak masterra antolatu dute.
Lehenengo egonaldi hartan bildutako materialarekin osatu du Garabidek Beltzean mintzo dokumentala. Itxuraz soila baina edukiz betea: Kitxua, nasa, nahuatl, kaqchiquel, aimara, maputxe eta maia yukatek hizkuntz komunitateen berri izan genuen dokumentala ikustean, eta euskararen biziberritzea nola ikusten duten ere kontatu zuten azken zatian. Ameriketako jatorrizko hizkuntzen arnasestua eta itxaropen taupadak Salatxo aretoan sumatu genituen.