Arrauna

Bi estropadatan hiru garaipen

Argazkia: Baleike

Gipuzkoako Batel Ligako bi jardunaldi izan dira asteburuan. Larunbatean Hernanik antolatutako estropada izan zen Loiolan eta igandean Zumaiak antolatutakoa Zumaian bertan.

Larunbateko estropada eguerdian hasi zen, 12:30ean. Eguraldi deserosoa egiten zuen arren, arraunerako baldintzak ez ziren horren kaskarrak. Euria egiten zuen, bai; baina ibaiak ez zuen korronte handirik. Oriok hamaika batel aurkeztu zituen.

Hamaika baten horietatik arraun egiten lehenak emakumezko infantilak izan ziren. Hirugarren egin zuen kategoria horretan A taldeak eta zortzigarren B taldeak. Kadeteek egin zuten gero arraun. A taldeak bosgarren egin zuen eta B taldeak hamaikagarren.  Jubeniletan bigarren egin zuten oriotarrek.

Gizonezkoetan, infantiletan, A taldeak bigarren egin zuen, B taldeak laugarren eta C taldeak hamalaugarren. Gizonezko kadeteetan lortu zuten zotzigarren jardunaldiko garaipen bakarra. A taldea izan zen kategoria honetan irabazlea. 7:16:47 denboran egin zuten ibilbidea, bi luze eta ziaboga batekoa. Atzetik San Juan sailkatu zen segundo bat eta hogei zentesimara. B taldeak hamahirugarren egin zuen eta C taldeak hamabosgarren.

Igandean Zumaian jokatu zen estropada, goizeko 11:00etan. Zumaiara ere Orioko hamaika batel etorri ziren. Infantiletan, emakumezkoetan, A taldeal laugarren egin zuen eta B taldeak seigarren. Kadeteetan txapeldun izan ziren oriotarrak, Hibaikaren aurretik, sei segundoko aldea aterata oreretarrei. B taldeak bederatzigarren egin zuen. Jubeniletan ere txapeldun gelditu ziren oriotarrak. 9:33:00 denborarekin, lau segundoko aldea atera zioten bigarren sailkatu zen San Juani. 

Gizonezkoetan, infantiletan, A taldeak bigarren egin zuen eta B taldeak laugarren. Infantiletan, ontzi mistoak, hamabosgarren egin zuen. Kadeteetan A ontzian bigarren sailkatu zen, B ontzia hamaseigarren eta C batela hamazazpigarren.

 

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!