Euskal Autonomi Erkidegoko eskoletan 80ko hamarkadan hizkuntza ereduak ezarri aurretik, Orioko Zaragueta Herri Eskolan haurrak euskaraz hezi eta hazteko beharra eta gogoa piztu zen 70. hamarkadan. Zaragueta Eskolatik adierazi dutenez, familien, eskolako langileen eta beste hainbat lagunen “borroka eta lanari” esker euskaraz irakasten hasi zen Orioko eskola. Aurten beteko dira 40 urte Zaragueta Herri Eskolan lehen ikasle taldeak bere ikasketak euskara hutsean egiteko aukera lortu zuenetik. Ordutik hona ere bidea gorabeheratsua izan da, zaila, oztopo eta une gazi-gozoz betea. Baina merezi izan du, adierazi dute.
Herritar haiek ereindako haziari esker, harro esan dezakegu Zaragueta Herri Eskolan Orioko haurrak euskara hutsean hezten eta hazten ditugula. Horregatik , 1977an hasitako bidearen 40. urteurrena ospatuko dute ikasturtean zehar.
Ikasturte osoko egitaraua
Zaragueta Eskolako komunitatea ikasturte osorako egitaraua prestatzen ari da, baina ospakizunei hasiera emateko ostiralean 17:00etan ilusio handiz prestatu duten hasiera ekitaldia ospatuko dute Zaragueta Eskolan. Hazia erein zenutenak, 40 urtetako bide luze honetan partaide izan zareten familiak, langileak, ikasleak, eta oriotarrak gonbidatuta zaudete. Zatozte ospatzera, zer ospatua badago eta!.