Bi partida etxean eta bat kanpoan jokatuko dituzte Orioko Pilota Elkarteko jokalariek asteburuan. Lehen partida gaur jokatuko dute, urriaren 6an, Etxegiak eta Beldarrainek. Zizurkilgo Intxaur frontoian izango da partida, 20:30ean, eta Su-Berriren kontra jokatuko dute oriotarrek. Emakumezkoen gomazko paleta modalitatean bigarren mailan jokatzen dute Etxegiak eta Beldarrainek.
Gainontzeko partidak Orioko Udal Pilotalekuan jokatuko dituzte pilotariek, urriaren 8an, igandean. 11:00etan hasiko dira partidak eta Lertxundik eta Aranaldek jokatuko dute lehenbizi. Zumaiarren aurka arituko dira eskuz binakako bigarren mailan. Ondoren, Esoain eta Illarramendik jokatuko dute Atxurbideren kontra. Gizonezkoen gomazko paleta modalitatean hirugarren mailan aritzen da bikotea.