Gipuzkoako Foru Aldundiak eta Gipuzkoako Mendizale Federazioak Talai Mendi elkartearekin elkarlanean antolatuta, Eskolarteko XXI. Ibilaldi neurtua egingo dute igandean, Orion.
Ikastola aurretik abiatuko da, 08:30ak eta 09:00ak bitartean, eta ibilbide motza edo luzea egin ahal izango dute parte hartzaileek. Bi ordu eta erdiko denbora izango dute haurrek 8 kilometroko ibilbide motza egiteko, eta hiru ordu eta erdian iritsi beharko dute helmugara 10 kilometroko ibilbide luzea hautatzen dutenek. Nolanahi ere, lasterketetan ez bezala, partaideek erregulartasuna lortu beharko dute, eta ez bizkortasuna.
Neska-mutikoen artean mendizaletasuna sustatu nahi dute ibilaldiaren bitartez. Parte hartu nahi duten umeek izen ematea beren ikastolaren edota eskolaren bitartez egin behar dutela esan dute antolatzaileek, eskola kirolaren barruan; taldeak gutxienez hiru haurrez osatuta egon beharko dute, eta gehienez ere bost haurrez. Alabaina, familia giroan ere parte hartu daitekeela esan dute, eta nahi duenari egunean bertan ikastolako pergolara bertaratzeko dei egin diete Talai Mendi elkarteko kideek. Ibiltariek beren parte hartzea baieztatu beharko dute harrera mahaietan, eta ondoren hasiko dute ibilbidea.
Gipuzkoako gainontzeko eskualdeetan ere izango dira eskolartekoen ibilaldi neurtuak igande berean; Oiartzunen, Donostian, Aretxabaletan eta Seguran, hain zuzen ere.