Lau eguneko bidaiaren ostean, gaur eguerdian iritsi dira Oriora Zergatik ez? taldeko arraunlariak. Azken etapan itsas baldintza onak izan dituzte, eta aurreikusitako denbora tartean osatu dute Ondarroa eta Orio arteko ibilbidea.
Zeharkaldia traineru bakarrean egin dute taldekideek, tripulazioak txandakatu eta deskantsatzeko tartea izan zezaten. Gaurkoan, ordea, azken kilometroak bi txalupetan egin dituzte, eta taldeko 30 kidetik 26 arraunean ailegatu dira moilaraino; kanpoan geratu diren laurak, berriz, zeharkaldian lagun izan duten Apikale ontzian egin dute sarrera.
Arraunlariak lehorreratu direnean, txalo eta oihu artean hartu dituzte han ziren herritarrek, eta emozio une handiak bizi izan dira. Ikaragarria izan da harrera, azaldu du ikusle batek. Moilako ongietorria bukatutakoan, tostartera itzuli eta Arraunetxeraino segi dute arraunean, txalupak han jasotzera. Baldintza oso gogorrekin hasi zuten erronka eguraldi eta gozo zapore ederrarekin bukatzea lortu dute.