Zaragueta Herri Eskolako ikasleek bat egin dute azaroaren 25eko aldarrikapenekin

Emakumearen aurkako indarkeria salatzeko egunaren harira, aste osoan zehar gaia lantzen aritu dira Orioko Zaragueta Herri Eskolako ikasle eta irakasleak.

"Tratu ona, guztiona" lelopean, jarduera desberdinak burutu dituzte astean zehar. Lehen Hezkuntzako geletan "Tratu onak eta ez hain onak" lelopean eskolako egunerokotasunean gertatzen diren egoerak sailkatu dituzte. DBHko ikasleak, berriz, astean zehar gaiaren inguruan hausnartzen ibili ondoren, ikasitakoarekin eta ateratako ondorioekin azalpenak ematen ibili dira Lehen Hezkuntzako ikasleei. Haur Hezkuntzako ikasleek margotutako puntu more handi bat ere jarri dugu eskolako atarian. Gero, gela bakoitzean idatzitako esaldi eta marrazkiekin apaindu duguna.

Bukatzeko, eskolako frontoian elkartu dira Lehen Hezkuntzako 5. eta 6. mailako ikasleek eskainitako zinta-dantzaz gozatzeko. "Tratu ona guztiona da gure aldarrikapenaren leloa. Hala bedi. Berdintasunean hazi eta hezitako pertsonen eskutik, emakumeen aurkako indarkeriarik gabeko mundua eraiki dezagun!"

 

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!