1957. urtean, Jorge Oteiza oriotarrak nazioarteko eskultorerik onenarentzako saria jaso zuen Sao Pauloko IV. Bienalean. 60. urteurrena dela eta, artista oriotarra oroituko dute Kutxa Kulturren, Jorge Oteiza Sao Paulon. 60 urte Bienalean izan zuen garaipenetik hitzaldiaren bidez.
Gaur, asteartea, izango da Catalina Erauso Arte Elkarteak antolatutako doako saioa, 19:30ean Kutxa Kulturreko Ruiz Balerdi aretoan (Tabakalera eraikina, Donostia). Juan Pablo Huercanos hizlariak Bienalean Oteizak aurkeztutako lanak izango ditu hizpide, eta baita bere obren bilakaera orokorra ere. Hortik abiatuta, nazioarteko artearen bilakaera eta testuinguru historikoa ere aztertuko ditu, artea gerra hotzaren testuinguruan kokatuz.