Orioko Udalak datozen bi urteetan Orioko argiteria publiko osoa berrituko duela jakinarazi du. 500.000 euroko inbertsioa egingo du horretarako, eta kopuru horren erdia jasoko du diru-laguntzatan. Hain zuzen ere, lanak burutzeko 250.000 euro bideratuko dituzte IDAE-FEDER Europar funtsetatik. Diru-laguntza jasotzeko zehaztutako baldintzen arabera, bi urtetan amaitu beharko dituzte lanak; 2020. urtean, alegia.
LED erako argiak jarriko dituzte, eta argiteria erregulatzeko sistema berriak ere instalatuko dituzte. Udalak azaldu duenez, elektrizate-kontsumoan gehiago aurreztea ahalbidetuko dute azpiegitura berriek; kontsumoa %80 jaitsi daiteke, urtean 55.000 euro inguru aurreztuz.