Euskal Herriko Mugimendu Feministak deituta, martxoaren 8rako greba feminista antolatu dute, eta Orioko emakumeek ere bat egin nahi dute lanuztearekin. Orioko Xaltxerak talde feminista lanean hasi da greba eguna antolatzeko, eta bilera irekia egingo dute urtarrilaren 24an, ostegunean. 19:00etan izango da bilera, Orioko Kultur Etxeko aretoan, eta herritarrak bertan parte hartzera gonbidatu dituzte.
Greba egiteko hurrengo arrazoiak azaldu dituzte Xaltxerak taldetik: "Eredu ekonomiko honek zapaltzen gaitu. Indarkeria matxistak jipoitzen gaitu. Arrazakeriak erailtzen gaitu, eta kultura patriarkalak baztertu, objektu bihurtu eta estereotipatzen gaitu. Horregatik Orioko emakumeaok aurten ere planto egingo dugu".