"Bi astebururako joan eta sei hilabete egin nituen Xixarion"

La Salbe zubitik behera Rekalde zumarkaleko laugarren zenbakian egin dugu zita, Bilbon. Bertan dago Porrue jatetxea, Unai Campo santutxuarrarena. Ezaguna da Orion: Luis Mariren, Joxe Migelen eta Mikelen ondoan ikusi dugu Bisigu festaren edizio guztietan. Garbi esango dizuet, geroz eta gehiago estimatzen ditut bere lanari buruz hizketan hasi eta begiak dir-dir egiten dieten pertsonak. Hemen duzue bat.

Unai Campo Pintor
Neguko barazkiak parrilan urdaiazpiko saldarekin

Osagaiak: Orburu edo alkatxofak, brokolia, azalorea edo kolifrora, kardoa, borraja, bruselaza, romanescu azalorea, oliba olioa, gatz larria,
Salda egiteko: Urdaiazpiko hezurrak, porrua, tipula, azenarioa, apioa, baratxuria, perrexila, ura.


Nola egin?
Ohiko moduan egingo dugu salda: ur hotzean jarriko ditugu osagai guztiak, eta bi ordu  edukiko ditugu sutan. Parrilan  generoa eta suaren arteko distantzia zaindu behar dugu, hogei zentimetrora kokatzen dituzte Porruen.
Denbora gehien behar duten barazkiekin hasiko gara: hamabi bat minutu behar dituzte orburuek eta karduak, azken bost minututan gehituko ditugu beste barazki guztiak.Berdurak parrilatik atera, platerean kokatu eta ondo gozatzea besterik ez da geratzen: oliba olioa eta  gatz larria erabiliko dugu. Mahaikideen aurrean gehituko diogu urdaiazpiko salda.

Gomendatutako edaria: Katxiña Txakoliña

 

Sukaldea aukeratu zenuen? Nolatan? Zergatik?
Gurasoek jatetxerik izan ez arren  sukalderako ohitura handia izan dugu etxean. Gogoan dut sukalde gainera igotzen ninduela amak. Lapikoari begira orduak egindakoa naiz; handitu ahala barazkiak txikitzen jartzen ninduten. Institutuko garaian jatetxe batean egin nuen lan eta gustuko nuela ikusi nuen. Orduan erabaki nuen Galdakaoko Goi Mailako Ostalaritza Eskolan sartzea.


Ikasketa prozesuan ezagutu zenuen Xixario jatetxea.
2008. urtean iritsi nintzen Xixariora. Ordurako hamar urte aritua nintzen sukaldari lanetan, eta jatetxe propioa irekitzea erabakia nuen. Baina, urtebeteko obra behar zuen gaur egun Porrue jatetxea daukagun lokalak.  
Buruan neukan zer eskaini: Bilbon haragia leku dezentetan eskaintzen da, baina arraina parrilan jateko oso leku gutxi zeuden. Lagun batek oso garbi esan zidan: arraina parrilan egiten ikasteko segi Oriora.


Hain berezia al da gure estiloa?
Parrila bakarra da Oriokoa: laua, estatikoa eta sutatik oso gertu kokatzen da arraina. Segitutik oso harreman ona egin nuen Luis Marirekin, bi astebururako joan nintzen baina sei hilabete egin nituen bertan. Oriotarrak oso gertukoak zarete, norbera kutsatzeraino. Santutxukoa naiz ta ez naiz Realekoa egin, baina arraunean oriotarra sentitzen naiz.


Udan hamar urte beteko ditu Porrue jatetxeak. Parrila da zuen lanabesa?
Hala da. Arrainaz gain mariskoa, denboraldiko barazkiak eta haragia txingarretan egiten ditugu: lanpernak, ilarrak, kokotxak, denboraldian angulak, kabiarra, perretxikoak, txirlak, olagarroa, orburuak edo alkatxofak, mihi-arraina, legatza, atun gorria eta, nola ez, Bisigua Orio Estilora.  Proposatzen dizuedan errezeta ere dastaketa menuan daukagu, parrilan egina.


Etxeko produktuak dira zuen ia denak.
Bai, Bizkaiko hornitzaileekin egiten dut lan, kartaren atzeko aldean dago zerrenda. Uste dut herritarrek geroz eta gehiago estimatzen dutela etxeko produktuak erabiltzearen filosofia, bertakoa balioan jartzea, hain justu. Gure gain daude hautu hauek.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!