Joan den ostegunean, martxoaren 21ean, 17 urte bete ziren ETAk Juan Priede Orioko PSE-EEko zinegotzia hil zuela. Hori dela eta, urtero bezala, gaur eguerdian Juan Priede omendu dute bere senideek, lagunek eta alderdikideek. Orioko hilerrian elkartu dira guztiak, eta hamabiak puntuan hasi da haren omenezko ekitaldia. Lehenik eta behin lore eskaintza egin dute, eta jarraian "Orio eta oriotarren alde" egin zuen lana aitortu dute. Gipuzkoako PSE-EEko idazkari nagusi Eneko Anduezak hartu du hitza: "Juan Priedek Orioko bizilagunen bizitza hobetzea izan zuen beti helburu, eta haren oroimena bizirik mantentzeko modurik onena, bere lanari jarraipena ematea dela uste dugu. Horretan ari da bere alaba Ana Pride Orioko Udalean, eta ziur gaude Juan harro egongo dela bere alaba Ana egiten ari den lanaz".
Senideez gain, ekitaldian izan dira Euskadiko PSE-EEren Idazkari Nagusi Idoia Mendia, PSE-EEren Gipuzkoako Ahaldungai Nagusi Denis Itxaso eta Euskadiko alderdi sozialistaren presidente ohi Jesus Egiguren; baita alderdi sozialistako beste hainbat lagun, besteak beste, Orioko Udaleko PSE-EEko zinegotzi ohi Jesus Rodriguez eta Zarauzko alderdi sozialistako kide Gloria Vazquez eta Patxi Elola.