Asteburu honetan jokatu dituzte Euskadiko batel eta zortzikoen txapelketa, Legution. Guztira, Orioko zazpi ontzik parte hartu dute estropadetan: infantil neskek eta mutilek, kadete neskek eta mutilek, eta jubenil neskek eta mutilek batel txapelketan; eta senior mutilek zortzikoen txapelketan. Hiru domina irabazi dituzte oriotarrek, zilarrezko bat eta brontzezko bat bateletan, eta zilarrezkoa zortzikoan.
Atzo, larunbata, eman zioten hasiera Euskadiko batel txapelketari, eta gaur, igandea, izan dira finalak. Kadete neskak, jubenil neskak eta kadete mutilak aritu dira finaletan, eta bi domina lortu dituzte. Kadete neskek bigarren egin dute, zilarrezko domina poltsikoratuz, eta jubenil neskek, aldiz, hirugarren postua eta brontzezko domina eskuratu dituzte.
Bestalde, Euskadiko zortzikoen txapelketa ere izan da gaur Legution, eta bertan izan dira Orioko senior mutilak. Hondarribia Arraunketa Elkartekoak gailendu dira, eta bigarren egin dute oriotarrek. Hirugarren postuan Raspas taldekoak gelditu dira.