Euskal Herriko Mini Klubak hirugarrenez antolatu du Euskadi Mini Meeting, hau da, Mini auto klasikoen topaketa. Maiatzaren 10ean, 11n eta 12an izango da, Orion. Bi urtean behin elkartzen dira, eta Espainiako estatu osoko parte hartzaileak bertaratzen dira. Antolatzaileen arabera, aurten 31 pertsonak eman dute izena momentuz, eta besteak beste, Bartzelonako, Lleidako, Castelloko, Logroñoko, Galizako eta Euskal Herriko kideak izango dira Orion.
Orioko kanpinean hartuko dute ostatu parte hartzaileek. Bertan elkartuko dira ostiralean, maiatzak 10, eta ingurua ezagutzeko aukera izango dute nahi dutenek. Gauean elkarrekin afalduko dute kanpinean.
Larunbatean, maiatzak 11, 09:30ean emango diote hasiera egitarauari. Orioko kanpineko sarreran elkartu eta Biarritz aldera mugituko dira mini autoetan, kostatik. Biarritz izango da helmuga, eta hara iristean, bazkaldu egingo dute. Parte hartzaile bakoitzak erabakiko du noiz itzuli Oriora, baina guztiak elkarrekin bueltatzen saiatuko dira. Gauean, aldiz, Ashé jatetxean afalduko dute, eta kanpoaldean erakutsiko dituzte Mini auto guztiak. Igandean, maiatzak 12, ez da egitasmo berezirik izango.
Euskadi Mini Meeting-eko egitarau osoan parte hartzeko izen-emate epea itxi dute dagoeneko, baina antolatzaileek azaldu dutenez, interesa duen oro bertaratu daiteke larunbateko ibilbidea egitera.