Lehen aldiz bi ibilbide izan zituen Orio Mendi Lasterketak atzokoan. 22 kilometroko ibilbidean 200 korrikalari inguruk hartu zuten parte, eta Ibai Makazaga oriotarra eta Maialen Gurrutxaga amazketarra izan ziren lehenak helmuga zeharkatzen. Makazagak 01:55:52ko denboran amaitu zuen lasterketa, eta Gurrutxagak 02:21:35eko denboran. Emakumezkoetan helmuga zeharkatu zuen lehen oriotarra Sara Peña izan zen eta bigarren egin zuen lasterketan, 02:22:49eko denborarekin. Hirugarren, Oihana Zubillaga anoetarra izan zen (02:28:15). Gizonezkoetan, Iosu Goñi amezketarra izan zen bigarren (01:57:13), eta Hodei Alkorta aiarra izan zen hirugarren sailkatua (01:58:54).
Lasterketa laburreko txapela ere Oriora
Aurtengoan lehen aldiz 11 kilometroko ibilbidea egiteko aukera izan da, eta Kamel Ziani oriotarra izan da gizonezkoetan txapeldun, 00:50:33ko denborarekin. Emakumezkoetan, Leire Baraibar zumaiarrak eskuratu du lehen postua (00:59:43).