Kimu neskentzako eskubaloiko teknifikazio saioak egingo dituzte gaur

Orio Eraginek antolatu ditu teknifikazio saioak, eta bigarren hitzordua izango da gaurkoa. Lehen Hezkuntzako 5. eta 6. mailako neskei zuzendutako prestakuntzak dira.

Aurten, Orioko Herri Ikastolaren izenpean eta Zarautz Kirol Elkartearen babesarekin, 70-80 neska inguruk jokatu dute eskubaloian Orion, infantil zein kimu mailetan. Herrian eskubaloian dagoen parte hartzea ikusita, "erronka berri" bati eustea erabaki dute zenbait kidek, eta Orio Eragin Eskubaloi Kluba sortu dute, datorren ikasturteari begira. Dena den, dagoeneko hasi dira egitasmoak antolatzen. Ekainerako eskubaloi udalekuak prestatu dituzte, eta aurreko astean zein honetan, kimu neskei zuzendutako teknifikazio saioak izango dira.

Aurreko asteartean, maiatzak 21, egin zuten lehenengo teknifikazio saioa, Karela kiroldegian. Gaur, asteartea, bigarren saioa izango da, leku berean. 17:00etan Lehen Hezkuntzako 5. mailako nesken txanda izango da, eta jarraian, 18:00etan, Lehen Hezkuntzako 6. mailako neskena. Hala, Eraginekoek aiarrak zein oriotarrak gonbidatu dituzte teknifikazioetan parte hartzera.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!